Татарстан Язучылар берлеге бакчасында шигъри слэм узды

Дусларым белән уртаклашам:
Click to view image

автор: Рузилә Мөхәммәтова

Бүген кич Татарстан Язучылар берлеге бакчасында үткән Җәйге шигъри слэмда төрле яшьләрдәге тугыз шагыйрь катнашты. Шигырьләрне иллеләп тамашачы тыңлады, тыңлаучылар арасында “Татар-информ” хәбәрчеләре дә бар иде.

Шигъри чараны Татар яшьләре форумы лидерлары Тәбрис Яруллин, Рәдиф Кашапов һәм танылган яшь шагыйрә Йолдыз Миңнуллиналар оештырды.

Шигъри слэм кагыйдәләре буенча, шигырь язучылар алдан заявка бирәләр. Слэмның беренче турында шигырьләр билгеләнгән вакыт кысаларына сыешырга тиеш – ягъни, бер минут вакыт эчендә. Шигырь башланыр алдыннан Тәбрис барабанга суга, бер минут узгач, вакыт чыкканын искәртеп тагын бер суга. Тамашачы 1дән 5кә кадәр балл белән аларның артистлык осталыгын һәм шигырьне бәяли. Икенче турга узучылар шигырьләрен үзләре теләгән кадәр вакытта укыйлар – Тәбрис барабанга сукмый.

Слэмга катнашырга 22 кеше теләк белдерсә дә, Язучылар берлеге бакчасына шуларның сигезе генә килгән булып чыкты. Барысы да яшь кызлар. Тугызынчы булып, кызлардан соң, шигырь сөйләргә өлкән яшьтәге шагыйрь-язучы, Татарстан Язучылар берлеге әгъзасы, галим Хәнәфи Бәдигый чыкты. Жюри аның картлыктан качу турындагы шаян шигырен югары бәяләде.

Нәтиҗәдә, бакчага яшьләрне күрергә генә дип килгән Хәнәфи ага, яшь шагыйрәләр Алсу Сәлахова, Гүзәл Закирова, Карлыгач белән бергә икенче этапка үтте. “Мин яшьләр иҗатын гына күрергә дип килгән идем, бәйгедә катнашу уем да юк иде. Яшьләребез талантлы икән, матур шигырьләр язалар, күңелле кичәләр оештыралар”, - диде Хәнәфи Бәдигый “Татар-информ” хәбәрчесенә.

Икенче турдан соң Гүзәл Закированың беренче урынга чыгуы мәгълүм булды, икенче урында – Хәнәфи Бәдигый, өченче урында Алсу Сәлахова, ә дүртенчедә – Карлыгач.

Җиңүчеләр үз шигырьләрен “Печән базары”нда – Җәйге шигъри слэм финалында укыячак.

Җәйге шигъри слэм Татарстан Язучылар берлеге бакчасында узса да, яшьләрне тыңларга Татарстан Язучылар берлеге җитәкчелеге һәм идарә әгъзалары чыкмады.

Әлеге чара белән яшьләр Татарстан Язучылар берлеге бакчасын мондый шигъри кичәләр өчен активрак файдалану мөмкинлекләрен күрсәттеләр.

* * *

Шигъри слэм программасында “Oscar c7c5 акустик сеты һәм Тәбрис Overdrive Free төркеме чыгышы” дип игълан ителгән иде. Оскар с5с7 төркеменең Оскар Юнысов булуы татар яшьләренә мәгълүм, ә менә “Тәбрис Overdrive Free төркеме” яңалык иде. Бу Рәдиф Кашапов, Йолдыз Миңнуллина һәм Тәбрис Яруллинның уртак проекты булып чыкты. Рәдиф гитарада уйнаса, Тәбрис ярымшигъри текстлар укыды, аны үзенең “фирменный” стилендә Йолдыз Миңнуллина дәвам итте.

Тәбриснең Татарстан Язучылар берлегендәге Былтыр сыны басып торган агач төбе турындагы текстын татар шигъриятендә акынлыкны башлап җибәрү дип бәяләргә мөмкин. Тәбрис Яруллинның “шигърияте” лакланган агач төбеннән башлап, кабриолетта җилдергән егетләргә, гараж артында үбешкән студентларга һәм милли темаларга кадәр барып җитте.

Җәйге шигъри слэмның финалы август аенда Бөтендөнья татар яшьләре үткәрә торган Печән базарында булачак. Анда “Тәбрис Overdrive Free төркеме” чыгыш ясармы – әлегә билгесез.
 

чыганак: http://tatar-inform.tatar/news/2017/06/26/143308/

Other article