Камал театрының “Килмешәк” спектакле Кытай фестивалендә катнашачак

Дусларым белән уртаклашам:
Click to view image

автор: Чулпан ШАКИРОВА

Г. Камал театрының 112 сезонының беренче премьерасы “Килмешәк” берактлы драмасы Кытайда фестивальдә катнашачак. Бу хакта бүген спектакльнең журналистлар өчен ябык презентациясе вакытында билгеле булды.

“Килмешәк” – Норвегия-Кытай-Россиянең уртак проекты нигезендә язылган пьеса. Проект шартлары буенча, бу спектакль Кытайда фестивальдә катнашачак. Пьеса миграция темасына язылган.

Аның авторы - Сөмбел Гаффарова. Әлеге спектакльдә ул дәү әнисенең абыйсы, туган җиреннән аерылган Нәкыйп язмышын сурәтләгән.

«Мастер класслар вакытында, пьесамнан бер өзеген сәхнәләштерү өчен миңа Кытай режиссеры билгеләнде. Үзен Бобо дип таныштырды. Миңа ул башта ук: «Үземне түгел, сине, пьесаңны күрсәтергә т­елим. Шуңа күрә минем өчен текст – беренче чиратта», – диде. Ышанасызмы, Бобо татар бию көен табып, актерларны татарча биетеп тә алды бит әле! Куанычымнан авызымны ерып торганда, режиссерым: «Ә ахырда синең татарча җырлавыңны телим», – дип әйтеп салды. Кытай тикле Кытайда кайчан җырларга туры килер иде әле?! Һәр репетициябезнең ахырында кытайлар «Су буйлап»ны җиренә җиткереп көйләп чыга торган булдылар.

Пьесам сәхнәләштерелгән көнне күпме әзерләнеп-репетиция ясап, «Идел бит ул, тирән бит ул…» дип җырлый башладым. Төп героема карасам… Актерның күзләрендә нәкъ мин теләгәнчә – яшь бөртекләре ялтырый иде.

Барлык эскизлар уйналып чыккач, иң кызык өлеш – тамашачылар белән фикер алышу башланды. Пьесам кытай тамашачысына бик якын һәм аңлаешлы булып чыкты.

Шанхайда, бәлки, Норвегиянең берәр шәһәрендә, театраль фестивальдә сигез пьесаның барысы да уйналачак дигән план корылган. Бу – олы юлыбызның бер нәтиҗәсе. Ахыргы вариантларны кураторларга җибәрдек инде. Берничә драматург - Кытайдан икәү, Көньяк Африка драматургы һәм без спектакльләрне илләребездә куйдык . Хәзер инде барыбыз җыелып фестивальгә барырга җыенабыз - анысы кайчан була - билгесез әлегә, – диде “Килмешәк” спектакленең авторы Сөмбел Гаффарова. 

чыганак: http://www.tatar-inform.tatar/news/2017/10/13/150256/

Other article