***

Дусларым белән уртаклашам:
Click to view image

Кыштан язга кереп барыш...
Хисләрем иләс-миләс.
Дөньяма да нидер булды:
Әле тын, әле җиләс.

Кыштан язга кереп барыш...
Уйлар керде-чыктылы.
Соңгы буран мин тилене
Аяктан ук ектымы?..

Кыштан язга кереп барыш...
Йокылар туяр-туймас.
Язгы боз кебек юлларым –
Атлыймын кыяр-кыймас.

Кыштан язга кереп барыш...
Карлар аклы-каралы.
Көн дә сиңа гашыйк булам
Аермый ак-караны.

Кыштан язга кереп барыш...
Дөньялар әрле-бирле...
Өметләр дә яшәрер күк,
Яшәртсә язлар җирне.

Дусларым белән уртаклашам: