УРДА

Аватар пользователя Luiza
Луиза Янсуар
13.12.2013 Шигърият
Дусларым белән уртаклашам:

УРДА

Бәгырьдән үк – кылган кырыслыгы,
Бабаларым биргән калым микән?
Й.М.

1
Учка башын салган әремнәрнең
Кемнәр сизәр нидән әрнегәнен?
Языклардан булмас гали калып,
Мин белмәдем, ахры, кадерләрең...

Көннәр – төнгә, төннәр көнгә кояр
Һәм... кушылыр беркөн агымнары...
Шәһәр изри, йөрәгенә бикләп
Синең миңа илтмәс адымнарың...

Берни дәшмим...Җансыз өмет булып,
Актарам җиз яфрак каберләрен...
...Уч җылыңны җуйган бу бәгырьнең
Беркем белмәс нидән әрнегәнен...

2
Ярканатлар канатына яшеренеп,
Шомлы төштән бәргәләнә Төннең җаны...
Чыраларын сүндерде дә күнде күңел –
Бу җиһанда минем синсез – үксез чагым...

Яраларның саны – нигә?! Һәр яңасын
Юар өчен Идел суы җитмәс илдә...
...Дөнья йоклый... Агачларның күләгәсе
Шәүлә булып тәрәзләрдән керә өйгә...

Бабалардан килгән ырым-сихерләрне
Кузгатыйммы – ярлыкавың сорап җилдән?!
Җаннар – Күккә... Ә гомернең күперләрен
Кичәсе бар – барыбер! барыбер! – фани җирдә...

Ярканатлар канатына яшеренеп,
Шомлы төштән өзгәләнә Төннең җаны...
...Ярларына кага Идел... Һәм Таң ата,
Ягып көяз яңагына безнең канны...

3
Учтан учка чөйгән язмышмы бу –
Зынҗырларның уемтысы калган?!
Ышанмыйсың минем сагышыма...
Коры сүзләр, дисең...
Дымсу ярдан
Казансуга багам... Дулкыннарның
Хәтеренә меңнәр сеңеп калган...
Хак шаһитем булыр алар беркөн –
Хөкемеңне айкар, диеп: “Ялган!”
Ышанмыймын синең каргышыңа,
Һәм гомергә, ахры, ышана алмам...
Учтан учка иңгән бәгырьдер без –
Зынҗырланып кына имин калган...

4
Яргаланган канатларны яңгыр
Шифалы дым белән юатыр...
Йомылыр эз... Тымызык моң калыр...
Һәм таңнарда безне уятыр...

Күкләр – бакый! – элеккечә балкыр,
Тигезләнер бары упкыннар...
Мәңгелеккә иңгән яра булып
Үзәгемдә утың сулкылдар...

Мәңгелектән купкан сагыш булып
Бәргәләнер өнең – хәтердә.
...Чәрдәкләнгән Киләчәкне сиңа
Бүләк итеп китәм – кадерлә...

5
Яу тәшвишен тоеп кешни атлар,
Туфрак кантарларын актарып...
Кемнәрнеңдер Тарих битләренә
Уеласы бармы, ат алып?!

Ут-сызлавын бәллүенә салып,
Савыла җан, сыза төн ката...
Ыруына кисәтеп сүз ата
Чорлар аръягыннан Төрк Ата.

Кан исеннән исермәгән гасыр
Бармы икән җирдә?! Табалмам...
Кешни атлар, тезгеннәрен өзеп,
Сискәнгәндәй иске ярадан...

Кемнәрнеңдер Тарих битләренә
Сикерәсе бар күк бүген дә...
Чәрдәкләнгән өметләре белән
Меңнәр бага, әрнеп, Күгенә...

Кан исенә үчекмәгән гасыр
Бар ул – безнең хисләр үрендә.
...Кыны тулы чәчәк китерәмен
Сөю атлы Урдаң түренә...

6
Исәрме бер сау сулышлы җилләр,
Кагылырмы синле кыйблага?
...Казансуның дымсу битләрендә
Дастан тибри – безнең имляда...

Дастаннарның кыйммәте ни бүген?
Канлы куык, яшьме – нибары?!
...Үксезләнеп калган утыргычлар
Хәтерлиме безнең юрауны?

Җирән комнар, Көзгә ымсынгандай,
Онытылып бага күземә...
Безнең хәтер – тик безнеке... Затлап,
Чигәрсеңме бәгырь бүзенә?

Кыйблаларны синле якка тиңләп,
Яшәрмен мин – язда, көзләрдә...
...Умырылган дулкын битләрендә
Дастан тибри – безнең тезмәдә...

7
Кылганнарның кырыс хакыйкате
Кыл икегә телде йөрәгемне...
Безнең хакны хаклар дулкыннарга
Син... үкенү белән түләдеңме?!

Көзләр исә җанга һәр тарафтан...
Болытлар да әллә үпкәлеме?!
...Билбау итеп кыс та, атла урап
Бүгенгеңә яшьле үткәнеңне...

Безнең уттан дөрләр ят җилләргә
Мин йөрәгем белән түләрмен бер –
Кылганнарның кырыс хакыйкатен
Җан кыйммәте кадәр күтәрермен...

8
Бабалар угында агу бар –
Бәгырьне өтә эз-ярасы...
Гасырдан гасырга күченеп,
Безгә, әйт, никадәр барасы?!

Толымнар тыгызлап үрелгән,
Калкандай коелган бәгырьләр...
...Учларга кагып тын сагышын,
Ачынып елмая әремнәр...

Калымы ни кыйммәт – җаннарның?! –
Агулы укларга эл хәбәр...
Гасырдан-гасырга кайтаваз:
“Кайт инде... Урдаңда көтәләр...”

9
Ирек эзләп далаларга укталу – ник?!
Даусыз гына җибәрәмен синең җанны
Җиде якка... Җиде ятка... Бу әрнүне
Юар бары сумаладай Төннең каны...

Сагышымны түгәрмен дә җиде җырга,
Күгәрченнәр сибәр җилгә - йөрәгемнең
Ярчыкларын... Калдырып бу шанлы илне,
Мәҗнүн гизгән моң чүлендә бүзәрермен...

Терәк эзләп ят иңнәргә сыену – ник?!
Берьялгызым күтәрермен Сагыш йөген...
Җиде якта җиде ятлар көтәр мине...
Хыянәтсез караш белән багар Күгем...

Саклап мине Киләчәкнең ярасыннан,
Күкләремдә чагылыр ай – кисем-кисем...
...Гомер беркөн... теткәләнеп очар җилгә,
Уеп җанга Синле Чорның утлы төсен...

2008.

Бизәлеш: "Дом летающих кинжалов" фильмыннан кадр.

Дусларым белән уртаклашам: